نباتات المطبخ

موضوع النهاردة هو نباتات المطبخ , موضوع صعب و ربنا يقدرنى و اعرف اعمل حاجة .

نباتات المطبخ هى أى نبات بيستخدم فى الأكل وسهل زراعته فى الأصص أو الأحواض البلاستيكية .

النباتات دى كتيرة منها النعناع و البردقوش و الروزمارى و الزعتر و الجرجير و البقدونس و الشبت و المريميه و الثوم و الخس و اللفت .........الخ.

أول حاجة لما نيجى نزرع النباتات دى انا بفضل ان احنا نزرعها فى الاحواض البلاستيكية عشان نوفر اكبر مساحة ممكنة للنبات بالاضافة الى ان النبات دا هيبقى معمر معانا لفترة .

ثانيا الأحواض لازم يكون معمول لها صرف كويس بإن يتم وضع طبقة زلط فى قاع الحوض بارتفاع 3 سم قبل ان يتم تعبئته بتربة الزراعة عشان اى تراكم للمياه داخل الحوض هيعمل اعفان فى الجذور و النبات هيموت.

ثالثا لما نيجى نقطف من الحوض اى من النباتات السابق ذكرها يتم القطف باستخدام مقص و ان يتم القص من فوق سطح التربة ب 2-3 سم عشان نسيب مجال للنموات الجديدة , القص فوق سطح التربة مباشرة مش بيسيب اى مجال للبراعم الجديدة انها تنمو .

رابعا الرى و دا اهم حاجة بص يا سيدى كل اللى عليك انك كل يوم بتغرز عقلة صباعك فى الأصيص لو طلعت مرطبة يبقى النبات مش محتاج رى و لو طلعت ناشفة يبقى النبات محتاج رى و دى قاعدةعلى كل نباتات الأصص .

خامسا فى حالات اصابة النبات بمرض و استلزم انك ترش النبات بمبيد رجاء لو سمحت تقرأ الارشادات على عبوة المبيد عشان تعرف مدى سمية المبيد , يعنى كل مبيد مكتوب على العبوة بتاعته تقعد اد ايه ما تاكلش من الزرع ده لحد ما تاثير المبيد يروح عشان يبقى امن على صحتك , يعنى ممنوع نرش و تانى يوم ناكل , فترة الامان دى بتبقى فى الغالب من 10-15 يوم .

سادسا التسميد و دا اهم حاجة لأن دى مش نباتات زينة يعنى انت مش زارعها عشان الزينة , لا انت زراع عشان المحصول عشان كدة لازم الاهتمام بالتسميد كل 10-15 يوم باستخدام اسمدة ال NPK بالاضافة الى استخدام اليوريا و اللى لازم نكون حريصين فى استخدامه لانه سماد قوى و اى زيادةفى التركيز بتاعه ممكن يموت النبات و لكن لازم اضافته لنمو المجموع الخضرى بشكل جيد. كمان يفضل ان التسميد يكون مرة ارضى و مرة ورقى يعنى مرة يترش على التربة و المرة التانية يترش على اوراق النباتات .
سابعا كل نباتات المطبخ نباتات شمس يعنى لازم تبقى محطوطة فى مكان مشمس كل يوم .